PËRKITAZI ME KEQTRAJTIMIN FIZIK TË ZONJËS NURA Keqtrajtimi i të moshuarve nuk është rast por dukuri. Shkaqet që çojnë tek kjo dukuri janë nga më të ndryshmet, duke filluar nga zbehja e respektimit për prindërit si shkak kryesor, themelimi i qendrave për përkujdesje shëndetësore që kanë thjesht synime materiale, për të vazhduar më pas me rolin në zbehje gjithnjë e më shumë të shtetit në mbikëqyrje. Fenomenet trajtohen vetëm kur të plas ndonjë skandal, jo se ndërmerret ndonjë preventive paraprakisht. Kështu, në trajtimin e këtyre fenomeneve nuk duhet mjaftuar me një reagim, e aq më pak reagim vulgar. Dukuritë negative në shoqëri nuk lindin atypëraty. Ato janë fryt monstruoz i çoroditjes morale, shoqërore e institucionale të ngjizur kohë më parë në shoqëri. Prandaj, forma se si duhet trajtuar rasti i zonjës Nura dhe rasteve tjera kërkon më shumë se një reagim emocional. Kërkon reagim institucional. Shteti duhet të merret me këto fenomene në mënyrë permanente duke mos u mjaftuar vetëm me ndëshkimin e keqbërësve por edhe duke ndërtuar organizma për ngritjen e vetëdijes shoqërore për vlerat dhe virtytet. Nga perspektiva fetare, ne si mësues fetarë, do të mund të jepnim kontribut të madh. Fuqinë e elementeve shpirtërore në edukim nuk mund ta zëvendësojë asgjë. Ndërgjegjësimin që bën feja nuk mund ta bëjë askush dhe asgjë tjetër. Prandaj, mos injoroni kontributin që hoxhallarët mund të japin në luftimin e dukurive negative.