Arrestimet me dyshimet për terrorizëm dhe nxitje të terrorizmit patën bërë bujë. Ndonëse qe e ditur që në fillim se e tërë puna kishte të bënte me një aktrim të politikës para ndërkombëtarëve dhe se pafajësia e tyre, veçmas hoxhallarëve, deklarimet e të cilëve ishin publike, do të dëshmohej, megjithëkëtë, shqetësuese ka qenë gjykimi i disa mediave se kinse është gabuar me lirimin e tyre. Kanë qenë thirrje që rrënojnë të drejtat dhe që duan instalimin e një versioni diktatorial të demokracisë. Por, sikur nuk është mjaftuar me kaq. Këtë e kanë arsyetuar edhe me anulimin e vizitës së zyrtares amerikane Tina Kaidanov në Kosovë. E kam dëgjuar disa herë këtë arsyetim banal dhe e kam parë se si hipokrizisht integrohej si pjesë e lajmeve, analizave dhe artikujve nga dashakëqijtë e lirisë. Me sa kam parë deri më tani, anulimi i vizitave të zyrtarëve të huaj, është bërë për shkak të pakënaqësive me sistemin qeverisës, i cili është mykur nga korrupsioni, mungesa e sundimit të ligjit, krimi i organizuar, dhe se pikërisht këto të fundit janë nënvizuar si barriera kryesore e integrimit në BE.
Personalisht, mendoj se arsyetimet e mediave për mosardhjen e Tina Kaidanovit në Kosovë me lirimin e hoxhallarëve janë njollosje ndaj personalitetit të zonjës në fjalë, në veçanti, dhe të tërë qeverisë amerikane, në përgjithësi. Nëse është dëshmuar pafajësia e hoxhallarëve, atëherë a i bie kjo se qeveria amerikane paskësh kërkuar që me çdo kusht të burgosen, patën apo jo të faj? A nuk është ofendim ndaj demokracisë amerikane?! A nuk është shpifje ndaj idealit për të drejtën dhe lirinë e demonstrimit të saj?
Por jo vetëm kaq. Këto thirrje i kam parë si një ekstremizëm të llojit të vet, si thirrje që nxisin për shkeljen e dhunshme të të drejtave. Në çdo moment mund të arrestohesh dhe të burgosesh vetëm pse je mysliman.
Po pyes: A po shënderrohet Kosova në një kasaphane të drejtash?
