Dikush do të pyeste: Si të arrij nivelin e të parëve në dashurinë për Muhammedin [sal-laAllahu alejhi ve sel-lem] dhe si t’ia bëj që të arrij dashurinë, e cila do të jetë shkak i ndërmjetësimit të tij për mua, në njërën anë, dhe shoqërimit të tij në Xhennet, në anën tjetër?
Mënyra e realizimit të kësaj dashurie është e lehtë. Këtë, në të vërtetë, mund ta realizosh nëpërmjet katër gjërave – praktikave:
1.
Salavatet e shpeshta ndaj Muhammedit [sal-laAllahu alejhi ve sel-lem], dhe këtë pavarësisht formulimeve, edhe pse formulimi që këndohet në teshehhud (uljen në namaz) është më i miri. Ky salavat të mban në lidhje të përhershme me të dashurin [sal-laAllahu alejhi ve sel-lem]. Sa herë që ti i dërgon selam, ai ta kthen selamin. Kështu ka ardhur në hadith:
“ما من أحدٌ يُسلِّمُ عليَّ إلا ردَّ اللهُ عليَّ روحي حتى أردَّ عليه السلامَ
Nuk ka njeri që më dërgon selam, e që Allahu të mos ma kthejë shpirtin në mënyrë që t’ia kthejë selamin.” [Hadithi ka sened autentik. Shih: El-Edhkar, 154.]
Përveç kësaj, ne jemi të urdhëruar t’i dërgojmë salavate Muhammedit [sal-laAllahu alejhi ve sel-lem]. Allahu thotë:
إِنَّ اللَّـهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ﴿٥٦﴾
Është e vërtetë se All-llahu dhe engjëjt e Tij me madhërim e mëshirojnë Pejgamberin. O ju që keni besuar, madhërojeni pra atë (duke rënë salavatë) dhe përshëndeteni me selam.“ (El-Ahzab, 56)
2.
Studimi i biografisë së tij [sal-laAllahu alejhi ve sel-lem]. Sa më shumë që njihemi me jetën, mëshirën, moralin, dashurinë e tij për ne, zemra gjithnjë e më shumë lidhet me të dhe ai gjithnjë e më tepër bëhet i pranishëm në jetët tona.
3.
Pasimi i rrugës dhe traditës së tij [sal-laAllahu alejhi ve sel-lem]. Ne, kur të kemi mësuar për jetën, moralin dhe qëndrimet e tij, sigurisht se edhe do ta pasojmë, pasi që ndikimi i tyre është i fortë dhe ato na shtyjnë që të veprojmë mirë, të sillemi mirë, ta luftojmë të keqen me të mirë brenda dhe përreth nesh.
4.
Vizita e Medinës së Ndritur për ata që kanë mundësi. Allahun e lusim që të gjithëve të na mundëson këtë vizitë si dhe faljen e namazit në reudah. E, nëse nuk kemi mundësi ta vizitojmë, të paktën të jetojmë me salavatet ndaj tij dhe leximin e biografisë së tij [sal-laAllahu alejhi ve sel-lem].
Allahun e lusim që të na fisnikërojë me moralin e Muhammedit [sal-laAllahu alejhi ve sel-lem] si dhe të na nderojë me shoqërimin e Muhammedit [sal-laAllahu alejhi ve sel-lem] në Xhennet!
Përshtati në shqip: Sedat Islami
